Sawt al Niswa | صوت النسوة - نافذة ريبيكاRebecca's Window/

لما اكل الولد التفاحة

deema kaedbey — Sun, 03 Apr 2011 21:00:00 +0000

Sara AG

Rebecca Saab Saade

بتذكروا دروس القواعد؟ شو ما كانت اللغة اللي عم تتعلموها، بيتم تجسيد القواعد المعقدة من خلال امثلة بسيطة وتبسيطية. باللغة العربية، اشهر شي مثال الولد والتفاحة: “أَكَلَ الوَلَدُ التُفّاحَة.”

اي انسان عذّب حاله شي مرة بحياته تيعلّم حداَ شي لغة اكيد عنده ليستة من الجمل البسيطة والمفيدة. تعريف الجملة المفيدة انه تكون جملة قصيرة، تابعة للقاعدة اللي عم ندرسها، وسخيفة لدرجة ما بيسترعي المعنى الانتباه على حساب القاعد اللغوية.

من هالجمل “أكل الولد التفاحة“، “شرح الاستاذ الدرس“، “اشتريت ثلاثة أقلام“… “عنده كتاب واحد وله زوجتان اثنتان“… لأ؟ هيدا المتل مأخوذ من لغتي هويتي،“مدونة تهتم بشؤون اللغة العربية“. بالرغم من تشجيعي المطلق، ودعمي اللامتناهي لأي مبادرة تعنى بشؤون اللغة العربية، ما قدرت ما غص انا وعم بقرا هالجملة.

صعبة الوحدة تحدد نقطة وحدة بتختصر امتعاضها من هيدا المتل. ما بعرف اذا هيي فكرة انّه تعداد الزوجات جزء من تعداد ممتلكات، متل الكتاب الواحد. ولا هيي فكرة تعدد الزوجات. ولا هيي فكرة انو تعدد الزوجات/الاشياء تعتبر جملة مفيدة وتافهة.

بالنهاية، بتحدى الكاتبة هدى انو تستخدم جملة “اشترت عشرة سكاكين قطعت بها زوجها ارباً ارباً” او مثلا، “غمزت من وراء ظهر زوجها لعشيقها الفحل“، او عالقليلة بتحدى هدى تكتب مثلا، “لها حبيبان يحبانها ويحترمانها“.

كل ما ارجع اقرا هالمقال برجع بعصّب اكتر، وهيك بصميمي بتمنى تكون هدى كانت عم تتمنيك لما اختارت هالجملة. بس المنيكة مش ظاهرة ابداً، عالقليلة مش بالنسبة الي. وغضبي مش بس على هيدا المتل؟، بالرغم من فظاعته، غضبي على تكرار اخطاء الماضي كل ما بدنا نستذكر ثقافتنا. غضبي على الرجعية الملاصقة لأي جهد للرجوع الى اصولنا.

Publisher:

Sawt al' Niswa

Section:

Opinions

Category:

نافذة ريبيكاRebecca's Window/

Tags:

اللغة العربية والنسوية

Featured:

من هي عائشة التيمورية

deema kaedbey — Mon, 09 Aug 2010 21:00:00 +0000

Rebecca Saab Saade

من أمان حرم جامعة اليو سي أل آي بلّشت فتّش عن عائشة التيمورية. والأكيد إنّو الثقافة الشعبية، متى ذكرت عائشة التيمورية خلّدتها كأم عم ترثي وفاة البنت. وبالحقيقة هوية عائشة وحياتها ملفتة للنظر.

أوّل ما يسترعي الإنتباه هوّي إنّو عائشة من أم كردية وأب تركي، خلقت (١٨٤٠) وعاشت كل حياتها بمصر، لحد ما توفت (١٩٠٢). بهيك الإيام ما كان كلمة “كردي“ ولا كلمة “تركي“ مرتبطة بنفس الصور النمطية اللّي بيرتبطوا فيهن هلّق. بهيك الإيام كان بعدها كلمة تركي ببلد عربي يعني أرستقراطي ببلد عربي. أمّا كلمة كردي فما كانت بعد ارتبطت بالعذاب والقهر اللّي عانى منّن الشعب الكردي. وبهاك الإيام كانت بنت التيموري، لقبها التيمورية، ومش “عائشة التيموري“.

عائشة التيمورية بمعنى تاني تربّت مربى الأرستقراطيين. عاشت معزّزة مكرّمة، ما عرفت الجوع بإيامها، والأرجح ما كتير فكّرت بالجوع بحياتها، عالقليلة التاريخ ما تذكّر عنها أدب بيحكي عن الجوع. بس أكيد ما خليّت حياتها من الصراع والجوع للإصلاح الإجتماعي. بالنهاية حياة المرا بالمجتمعات الذكورية ما بتخلى من الصراع، والشاطرة بشطارتها بتعرف تصيغ إنتصاراتها بقوالب أدبية ولغوية بيفهمها سائر المجتمع تيخلّد ذكراها. أوّل معركة خاضتها عائشة، كانت للحق بالتعليم، ويمكن هيدا الصراع انطبع فيها لدرجة صبغ كل كتاباتها الإصلاحية.

لمّا وعيت عائشة عالدني، وعيت على حب الأدب والقلم. إمّا، (الوالدة) جرّبت تبعّدها عن الأدب “الرجولي” وتجبر ها على حب الخياطة والتطريز والفنون الجميلة “الأنثوية”. عائشة رفضت وقاومت القوالب الإجتماعية، والمقولِبة الأمومية، وما زادها القمع إلّا تمسّكاً بقلمها والكتاب. وإذ هون بيهب الأب لنجدة موهبة عائشة، يلّي بعدين وثّقت هالتجاذب اللّي صار بين الأهل على مصير البنت. وهيك عائشة ربحت أوّل معركة خاضتها وتعلّمت. وبقيت تتعلّم كل حياتها.

مع مرور السنين ومساعدة المقام الإجتماعي الرفيع، تملّكت عائشة من تلات لغات، العربية والتركية والكردية والفارسية، بالإضافة للكتير من العلوم والمعارف الأخرى. ويمكن هالمكانة اللغوية هيّي اللّي ساعدت عائشة على اكتساب احترام “الرجل الشرقي“، بما إنّا ما تأثّرت فكرياً بالفكر النسوي وفقاً للقالب الغربي-الأبيض. وهوني نقطة ضعفنا، عالقليلة بالنسوية اللبنانية، مع إنّو عائشة بتتشارك مع النسويات الحديثات الإنتماء للطبقة المخملية، إلّا إنّها على عكسن بتسمع وبتحكي، وبتقرا وبتكتب بلغات أقرب ثقافياً للمجتمع الشرقي.

أو يمكن هوّي تمسّك عائشة بالدين والقيم اللّي قرّبها لقلوب المجتمع الشرقي. عائشة اشتهرت بمناداتها لتعليم البنات، ممكن هالمطلب يبيّن ساذج بمعايير الحاضر، بإيامنا الحالية، الناس ما بترفض تعلّم بناتها، بس أوقات الفقر بيفرض على العيل إنّو تحط أولويات تعليمية، بس بإيام عائشة كانت فكرة تعليم البنات مستهجنة، على اعتبار إنّو البنت إذا تعلّمت رح تفقد أنوثتها.

وبالتالي كانت عائشة عم بتطالب بشي راديكالي. وكانت تدافع عن تعليم البنات كسلاح بإيدها لحماية شرفها وكرامتها:

بيد العفاف أَصون عز حجابي وِبِعِصمَتي أَسمو عَلى أَترابي

وَبِفِكرَة وَقـّــادَة وَقَريحة نَقّـــــادَة قَد كَمَّلــَت آدابـــــــي

ما ضَرَّني أَدبي وَحُسنُ تَعَلُّمي إلا بكونى زَهرَة الألباب

ما ساءَني خدري وَعَقد عِصابَتي وَطَرازُ ثَوبي وَاِعتِزاز رَحابي

ما عاقَني حَجلي عَن العليا وَلا سَدل الخِمار بِلِمَّتي وَنِقابي

عَن طي مِضمار الرَهان اِذا اِشتَكَت صَعب السِباق مطامح الرِكاب

تعتبر عائشة من روّاد المطالبين بتعليم البنات، وهيدا اللّي هّين علينا ننساه. هينة علينا نفكّر بالصعوبة اللّي واجهت نسويات الغرب للحصول على الحقوق البديهية متل التعليم والإقتراع وغيرها، بس مننسى إنّو نحنا ما أخدنا حقوقنا بالغلط ولا لأنّو مجتمعنا ما عنده تاريخ ذكوري، وإنّما بفضل قلم وفكر متنوّرين ومتنوّرات عرب.

غير موضوع تعليم النساء، كانت حياة عائشة عادية، تزوّجت بسن الـ١٤، لمّا توفّى بيّا أخدت على عاتقها تعليم خيّا الزغير، أحمد التيموري، يلّي بيوقتها كان عمره سنتين واللّي بعد هيك صار علّامة وأديب عربي كبير. ويمكن أغرب شي بيجمع الأخت والخي إنّو تنيناتن خسروا بشكل مبكّر أحد أولادن وما تخطّوا المأساة.

أحمد خسر إبنه، وصار ينتقل من نوبة قلبية لنوبة تانية، لحد ما مات بالـ١٩٣٠، يعني بعد ٨ سنين من وفاة إبنه. عائشة خسرت بنتها، توحيدة، اللّي توفّت بعد شهر من زواجها وهيّي بعمر الـ١٨ سنة. مع وفاة بنتها تخلّت عائشة عن العلم والقلم وبقيت ترثي بنتها، بالقلم والدمع، لحد ما ضعفت جسدياً ونصحها الأطبّا إنّو “تغيّر جو“.

بنتاه ياكبـــــــدي ولوعة مهجتـــي قد زال صفو شأنه التــكــــــدير

لا توصي ثكلـــــى قد أذاب فؤادها حزن عليك وحسرة وزفيـــــــــر

وبقبـــــلتي ثغر تقضى نحبه فحرمــ ت طيب شذاه وهو عطـــــــــير

والله لا أسلو التــــلاوة والدعــــــــا مـا غردت فوق الغصون طيــــور

كلا ولا أنســـى زفير توجـــــــــعي والقد منك لدى الثرى مدثـــــور

إني ألفـــــت الحــــزن حــتى أنني لو غاب عني ساءني التأخيـــر

قد كنــــت لا أرضى التباعد برهــة كيف التصبر والبعاد دهـــــــــور

أبكيك حتـــى نلتقي في جنـــــــة برياض خلد زينتهاالحــــــــــــور

توفّت عائشة سنة الـ١٩٠٢، وكانت بعدها عم تتحسّر على فراق بنتا. ومع مرور ١١٨ سنة على وفاتها، خلّينا نوقف ونفكّر شوي وين صرنا نحنا من تعليم البنات؟ لو عائشة عم تشوفنا اليوم، أولكن بتفتخر فينا ولّا بتضحك علينا؟

بتفرق الأرقام بحسب البلد بس اللّي فينا نقوله هوّي إنّو العالم العربي حقّق تقدّم ملحوظ بمستويات محو الأميّة النسائية. ما زالت النساء العرب بتشكّل ٦٦٪ من مجموع الأمّيين/ات بالعالم العربي. ولكن بالتمنينات، كانت مستويات الأمية عند النساء بالعالم العربي بحدود ٦٤،٩٪ للراشدات (فوق ١٥ سنة). بسنة الـ٢٠٠٠ كانت صار هالرقم بحدود الـ٤٠٪ مع فوارق شاسعة بين البلدان.

بس يمكن الإنجاز الأكبر اللّي حقّقوه رائدات متل عائشة، هوّي إنّو اليوم صار في وعي، إن على الصعيد الحكومي أو الإجتماعي، بحق المرا بالتعليم. بتبقى العوائق الأساسية إنعدام الإستقرار الأمني (وبالتالي صعوبة تنقّل النساء بشكل خاص)، والصعوبات المالية، والزواج المبكّر.

وصراحة ٤٠٪ أمية مش رقم مشرّف أبداً، ما بعرف شو ممكن تقول عائشة عن هيك أرقام، بس أنا بشوف الطريق بعده طويل. ومن هلّق تنوصل لـ٠٪، ومن هلّق لنوصل لتعليم النساء النظرة النقدية المجتمع، بحب قول لعائشة شكراً.

بعض القراءات اللّي بحب شاركها مع القراء:

التوجهات التربوية للفكر النسوي المعاصر بين المنظور الغربي والمنظور الإسلامي

عائشة التيمورية

كتابات عائشة التيمورية

Illiteracy in the Arab World

Publisher:

Sawt al' Niswa

Section:

Opinions

Category:

نافذة ريبيكاRebecca's Window/

Tags:

Featured:

عن الذاكرة الذكورية والنسوية الحلزونية

Pascale Ghazaly — Mon, 19 Jul 2010 21:00:00 +0000

Rebecca Saab Saade

“لماذا عندما نتحدث عن حركات الإصلاح الفكرية، خاصة تلك التي تتعلق بتحرير المرأة، لا يكاد يتبادر إلى ذهننا إلاّ محمد عبده، قاسم أمين، الطاهر الحداد، لطفي السيد، والأفغاني، وغيرهم..”

هيك بتفتتح حياة الرايس مقالها “هل الذاكرة العربية ذاكرة ذكورية؟” (http://www.aawsat.com/details.asp?section=19&article=33045&issueno=8160) المنشور بأوّل نيسان عام ٢٠٠١ بجريدة الشرق الأوسط، وهلّق بعد مرور ٩ سنين على نشر المقال، بعده صحيح بشكل موجع.

بمقالتها، بتطرح حياة أسامي لنسويات ما حدا سامع فيهن. أنا صراحة كتير أثار فيي هالمقال الرغبة بإنّو إشتري وإقرا كتابات هالنساء اللّي كتبوا تاريخي من زمان وبحياتي ما قدرت أوصلن، تاريخي أنا، هينة أوصل لكتب نسوية غربية، سيمون دو بوفوار مثلاً مشهورة. وحتّى إنّو أنا شخصياً بفتّش على التعبير الأدبي عن هويتي بكتب توني موريسن وأنجلا دايفس وأليس والكر وغيرن من النساء الأفريقيات الأميريكيات اللّي بيكتبوا عن المرا والتمييز الجندري/الطبقي، وعن التاريخ المسروق والهوية المتفككة وأهميّة الذكرى.

بس، للأسف بيصعب عليّي لاقي كتب ومقاطع أدبية بقلم نساء عربيات عن النساء العربيات. واللّي بينكتب عن الثقافة العربية الشمولية (بمعنى اللّي ما بتستثني النساء) بيجي بإطار تقارير مترجمة ومقالات إخبارية عن مرا انقتلت أو زوجة تطلّقت وإلى ما هنالك.

والأسوأ من هالخرف الأدبي الثقافي هوّي إنّو لمّا بتطلع على المنشورات النسوية/النسائية، ان كانت من ١٠ سنين ولّا من ١٥٠ سنة (عائشة التيمورية مثلاً عاشت من الـ١٨٤٠ للـ١٩٠٢)، بحس كأنّو عم بئرا عن نفس المجتمع، عن الجدل القائم بين ضرورة إحترام حكمة الله من خلال الرضوخ للإذلال ولّا إحترام حكمة الله بإجلال المرأة، يلّي خلقها الله وظلمها الإنسان. أوقات حتّى بحس إنّو النسوية العربية بعدها بنت زغيرة قاعدة عالشط وناطرة تكبر وتبلغ، وبالـ١٠٠ سنة اللّي قطعوا ما كبرت.

فاليوم، ومن هالمنبر الكريم بدعي كل الأخوات ونفسي، لنستحصل ونقرا ونتناقل ونناقش كل الكتب المكتوبة من قبل نساء ونسويات عربيات كتبوا بالعربي عن المجتمع العربي، بدءاً من:

عائشة التيمورية

ملك حفني

هدى شعراوي

سهير القلماوي

مي زيادة

نبوية موسى

وردة اليازجي

زينب فواز

نظيرة زين الدين

مين بعد؟

Publisher:

Sawt al' Niswa

Section:

Opinions

Category:

نافذة ريبيكاRebecca's Window/

Tags:

Featured:

الأقلية مش عيب ولكن

Azadeh Faramarziha — Thu, 17 Jun 2010 19:50:03 +0000

Sawt al Niswa

ربیکا سعادة

بسياق برنامج تبادل ثقافي شاركتفيه بالسويد، زرنا مركز إبن رشدللشباب المسلم من أجل السلام فيالسويد. كان لقاء، أقل ما يقال فيه إنهغير تقليدي. بالمنطقة هون تعوّدناعلى شرخ بين المتديّنينوتوتاليتاريّتهون وبين التقدّمييوعلمانيتهون. حكيونا عن صعوباتالهوية المسلمة بالسويد، الخوف منامحاء الهوية ورهاب الإسلام بالغرب مابعد أحداث ١١ أيلول. حكيونا كمان عنمفهوم السلام الديني بالإسلام، يعني تفسير كيف الدين الإسلامي ما بيدعي للعنف وكيف بعض الأفكار “الجهاد” عم تتاخد خارج إطارها من قبل متطرفين متل بنلادن. يعنيحكيوا عن كتير إشيا مهمة ما رح اذكرها كلها بها لمقال. بس الأهم من الحديث عنالإسلام بأوروبا كان حديث عن الأقليات.

كنّا عم نحكي عن الأقباط بمصر ووضعن كأقلية دينية، وإذ بينتفض أحد المشاركين وبيقولإنه “الأقباط ماهومش أقلية، همَّ جزء محترم من المجتمع المصري“. معظم الموجوديناعتبروا هالتصريح على إنه نوع من التحايل على الواقع. بس من بعد الجلسة، حكالي إنهلمّا منقول عن مجموعة إنها أقلية يعني بيحقّلها بحقوق أقل من البقية. استغربت بالأولهيدا التعريف، بس لمّا فكّرت بالموضوع لقيت إنّو فعليّاً اللي عم يحكي مظبوط..

بالنهاية، المرأة تعتبر أقلية بالمجتمع الذكوري، بتعاني من كل مآسي الأقليات، المجتمعبيتجاهل تاريخها، مشاكلها، حياتها، إنجازاتها، الخ. بس المرأة مش أقلية عددية، إذا شيهيي أقرب للأكثرية مما هيي للأقلية. من ناحية تانية، الطوائف بلبنان بتسعى دايماًلتضخيم حجمها بهدف الحصول على نسبة أكبر من الحقوق.

بالرغم من واقعية هالتعريف، ما حدا منّا كان مستعد يعترف إنّو أقلية يعني انتقاصبالحقوق. منحب كلنا ندّعي المساواة، ونقول إنّو نظرتنا للأقلية هيي نظرة عددية فقط،بس الواقع غير هيك. الواقع بيدل على خلل أخلاقي فظيع، بشكل إنّو قيمة الهوية هييبعدد أتباعها وقيمة الإنسان من قيمة تبعيّته.

Publisher:

Sawt al' Niswa

Section:

Opinions

Category:

نافذة ريبيكاRebecca's Window/

Tags:

Featured:

عن عنصرية مقعد الباص

hiba — Mon, 29 Mar 2010 21:00:00 +0000

by Sara AbuGhazal

Rebecca Saab Saade

قد ما يكون، نحنا عنا قيم، نحنا عنا احترام، نحنا شعب منخاف الله، عنا المرا محترمة، هلق اكيد الله عايش بالسما، فاذا عتمت الدني ما رح يشوفنا اذا قللنا من احترام مرا، وبالتالي ما بتتسجل علينا. بس مثلا، اذا بيطلع رجّال ختيار، يا حرام، على الباص وما لاقى مطرح يقعد، اكيد اكيد بينط عشر شباب يوقفوا تيقعد مطرحن، واذا مش عشرة، عشرين. او اذا طلعت ام وولدها عزندها، ولك بيوقف الباص كله سوا تتقعد، ولو! كرامة الولد واحتراما للامومة.

هيدا حديث بيتكرر كتير فوق فناجين القهوة، خصوصة لما ينذكر موضوع اوروبا او اميركا، حيث الفلوس والفسوق. هيدا الحديث اللي بيرسم صورة مجتمع افلطوني،عايشين في الناس بحب واحترام وتضحية. مجتمع ما بعرف من وين مستوحايينو، بس اكيد مش من المجتمع اللبناني اللي انا بعرفه.

المجتمع اللبناني اللي انا بعرفه هوي مجتمع باصات الحمرا، مطرح ما المقاعد قليلة والركاب كتار. طيّب، تفضلوا معي على فنجان قهوة الكترونية تخبّركن عن رحلة من رحلاتي بباصات الحمرا الاسبوع الماضي.

نهار الاربعا الماضي، كنت راجعة من الحمرا على الاشرفية، كتروا الركاب وخلصوا المقاعد. طلعت ست كبيرة بالعمر، رصدت الاجواء وما لقيت مقعد فاستسلمت وتمسكت بعواميد الباص. رصدت انا الاجواء ومتل العادة ساقبت ان كل الركاب كانوا بارمين وجّن على الشبابيك وعم يتأملوا زبالة بيروت الفنية. صدفة اكيد، لولا هالصدفة كان نط عشر شباب يقعدوها مطرحهن. فوقفت انا وقعّدت الست، اللي اكيد شكرتني.

بعد فترة، طلعت أم وولدها، اللي عمره شي سنتين، رصدت الاجواء واكيد لقيت الكل عم يتأمل الزبالة. تمسكت بعامود الباص ونزّلت ابنها من حضنها، واتمسّك الولد باجرين امه. على اول كوع طب الولد وكان رح يدكرب برات الباص عالطريق، فتكرّمت احدى الصبايا بإنها نصحته يتمسك بعامود الباص بايد وباجر امه بايد تانية. شكراً دوموازيل، مغفورة لك خطاياك. على الكوع التاني تكرر المشهد المأساوي، فوقف زلمي عمره شي خمسين سنةوقعّد الام. وساعتها بيبرم الشب اللي قاعد على نفس المقعد، بيتنازل عن مشهد الزبالة تيتحدّث مع الصبي الزغير، يسأله عن عمره واسمه وكل التفاصيل السخيفة. شكراً سيدي، مغفورة لك خطاياك. انا شخصيا كتير انبسطت لما شفت الصبي زابل الشب المتلاطف.

كمان بعد فترة، طلعت ام تانية مع بنتها اللي انجأ عمرها سنة. رصدت الاجواء وتأملّت اعجاب الشعب اللبناني بزبالة الطريق. بس هالمرة ما نوجد لا كبير ولا زغير يوقف تيقعدها، بالرغم من كترة الكواع، ولا حتى كرامة البنت الزغيرة.

كان بودّي ادّعي انه السبب اللي اعمى اهالي الباص عن واجباتهن الانسانية هوي الانانية الاعتيادية، بس ما قدرت اتجاهل الواقع اللي فرض ان هالبنت تكون بنت “وحدة سرلنكية“، وبالتالي، مش حلوة كفاية تحدا يأسف اذا وقعت على شي كوع.

بقي الشب المتلاطف يجرب يلفت نظر الصبي وبقيوا سكان الباص يبتسموا لهالصبي اللبناني اللي بشرته بيضا كفاية تينعتل همه. وبقيت الام الواقفة عم بتصارع كل كوع تتضل واقفة على اجريها وبنتها ما توقع من زندها. وبقيت انا حاقدة على الهوية اللبنانية.

جرّبت احقد على سكان باص الحمرا القاعدين، بس كانوا كتير كتار، ما عرفت عمين منن لازم احقد. جربت احقد على الشب المتلاطف بس لاحظت انه كتير معجوق بالصبي ومش ملاحظ حقدي. جربت احقد على الصبي الزغير، لأن يمكن لو هوي ما طلع بالباص أو ما كان لبناني كان ممكن عالقليلة هالختيار يوقف ويقعّد الام التانية، بس لاحظت ان هيدا الصبي بعد مش فاهم العنصرية المستشرية بالدم اللبناني. فجربت احقد على الست الختيارة اللي وقفت انا لقعدها، وللحظة فكّرت قلها: “سوري تانت، بس نكاية بالشعب العنصري بدي استرد مقعدي واعطيه لهيدي الام اللي ما حدا معبّرها”. بس لاحظت انه حقدي بالدرجة الاولى على نفسي، لأن بعرف انو كان بيكفي اني قول جملة وحدة: “يا شعب الله المتشبه بالبيض، حدا منكن يوقف ويقعد هالمدام. حرام، كرامة البنت” بس انا سكتت.

كرهت حالي على هيدا الصمت اللي ذكّرني بالمرات اللي كانوا فيها فيران المجتمع يتحشروا فيي ويدقوا فيي بالباصات العامة لأنن عارفين مش طالع من امري حتى كلمة. هيدا الصمت اللي ذكرني بالاوقات اللي منبقى قاعدين وبيطلع صوت واحد من “رجال العيلة” على مرته، وبيهينها وبيبهدلها والكل بيدّعي انن مش ملاحظين شي.

ومن كرهي لذاتي تطلّعت بالام المهمَلة ولما تطلعت فيي ابتسمتلها ابتسامة ال“بعتذر باسم اصحابي اللبنانيي عل الخرا“، على امل انو تنغفري خطاياي انا كمان، ابتسمتلي هيي كمان. ما بعرف اذا فهمت لغة الابتسامة، يما بس انبسطت انو عالقليلة حدا اعترف بوجودها، او بس لأن افتكرتني صبي عم يطحش عليها وما حبّت تستفزني.

بعد هيك رجعت لجذوري اللبنانية، برمت وجي وقعدت اتأمل زبالة بيروت الاصيلة، صبحان الخالق ما في احلى من زبالة طرقاتك يا بيروت

Publisher:

Sawt al' Niswa

Section:

Opinions

Category:

نافذة ريبيكاRebecca's Window/

Tags:

Featured: